Páxinas

26 outubro, 2020

A NOSA MASCOTA

Fai algunhas semanas a Biblioteca propuxo un concurso para conseguir unha mascota que representase a nosa biblioteca. Despois de todo este tempo por fin temos un gañador!!!

Sabemos que estabades ansiosos por coñecer o veredicto do xurado!

A semana pasada fixemos entrega dun diploma a todos os participantes, e por suposto, a Antía, a gañadora deste concurso. O seu debuxo, o Señor Ourizo, será a nosa mascota. 


Algúns dos participantes e a gañadora.



Benvido ao noso cole Señor Ourizo!! Benvido á nosa Nenoteca!



22 outubro, 2020

TEMA CENTRAL DA BIBLIOTECA

Esta semana presentamos aos nenos e nenas de Educación Primaria o tema central da biblioteca. 

Trátase dun tema sobre o que xirarán algunhas das actividades programadas dentro do plan anual de lectura do centro. 

Para que descubrisen o tema fixemos un Scape Room no que tiveron que poñer a proba todo o seu enxeño e habilidades para descubrir o enigma final. 






https://view.genial.ly/5f7e00e7334a2e0da75d2b60/game-breakout-scape-room-conecendo-a-biblioteca

Deixámosvos o enlace para ver se sodes quen de descubrir o código final e para que coñezades máis cousas sobre a nosa NENOTECA.


20 outubro, 2020

DÍA DA BILIOTECA - 24 DE OUTUBRO

O sábado día 24 de outubro celébrase o Día da Biblioteca. Van xa máis de dúas décadas desde que a Asociación de Amigos do Libro Infantil e Xuvenil propuxeran esta data para facer fincapé nos beneficios destas institucións ao servizo da lectura, da cultura e da cidadanía. 

Con motivo da celebración deste día, desde o equipo de biblioteca propoñemos a toda a comunidade educativa (pais, nais, alumnos de todas as idades, avós, mestres...) a seguinte actividade.


"EU RECOMÉNDOCHE"

- A actividade consiste en pensar nun libro que che gustaría recomendar a outra persoa. 

- Debes debuxar a portada do libro poñendo o título, o autor e a editorial (se é posible). 

- Engade unha frase que resuma por que elixes este libro. 

- Podes descargar a portada en blanco do blog ou pedirlla ao teu titor que che envío o arquivo. 

- Todas as portadas poderanse deixar na entrada do colexio (para Educación Primaria), nunha caixa habilitada para este fin, ou envialas escaneadas a este correo electrónico (para Educación Infantil e os que queiran de primaria): biblioteca@casadoneno.edu.es

- Cada participante pode entregar todas as recomendacións que queira. 

- O día límite de entrega é o 2 de novembro de 2020.

ANÍMATE A PARTICIPAR E RECOMEDAR O TEU LIBRO FAVORITO!

17 outubro, 2020

A BIBLIO CHEGA A INFANTIL

A biblioteca do cole tamén pensou nos pequenos de Educación Infantil e repartiu libros entre as clases do primeiro e o segundo ciclo.

Con este préstamo preténdese achegar a lectura a todos eles, e ademais complementar o seu proxecto con libros que lles axuden a descubrir novas cousas sobre os animais. 

Tamén se incluiron libros en inglés para que o teacher poida incluir nas súas sesións contidos relacionados co proxecto e facelo interdisciplinar!

Deixámosvos algunhas fotos para que vexades que caixiñas máis bonitas preparamos para eles!














07 outubro, 2020

A BIBLIOTECA E OS PROXECTOS

Dentro do Plan Anual de Lectura o equipo da biblioteca programou numerosas actividades para levar a cabo ao longo deste curso. 

Unha delas é o préstamo de exemplares relacionados coa temática do proxecto a cada aula. 

Por esta razón, esta semana fíxose entrega a cada clase dunha cesta de libros para o recuncho do proxecto dentro de cada aula, que se xestionarán de forma interna sempre que se necesite realizar consultas ou realizar lectura libre. 

Ante a situación actual do Covid, ademais existen unha normas específicas para a súa utilización, que son desinfectar as mans antes de coller os libros, e tras o seu uso deixalos nun espazo de corentena. Transcorridas 24 horas, os mestres volverán a despositalos no recuncho. 

Deste xeito a biblioteca tamén contribúe ao desenvolvemento dos proxectos e anima a todos os peques a seguir aprendendo e investigando a través dos libros. 








02 outubro, 2020

OS BOLECHAS VISITAN O NOSO COLE

Hoxe recibimos no edificio de primaria ós Bolechas, os alumnos e alumnas de 1º, 2º e 3º. 

O noso amigo Braulio explicounos que debemos facer ante unha situación de emerxencia: debemos chamar ao 112, manter a calma, intentar explicar o lugar exacto no que nos atopamos...

Pasamos un rato divertido á vez que aprendemos algo moi importante que pode salvar vidas se por desgracia nos toca vivir unha situación extrema. 

Deixámosvos algunhas fotos do momento, algún que outro vídeo e amosámosvos o agasallo que nos fixeron. 











 

24 setembro, 2020

AMPLIAMOS O PRAZO DE PARTICIPACIÓN

Ante a solicitude popular que nos fixéstedes ampliamos o prazo de participación no concurso da mascota da biblioteca ata o próximo venres día 2 de outubro. 

Animádevos a participar e deixar a vosa pegada no cole!



09 setembro, 2020

CONCURSO - UNHA MASCOTA PARA A NENOTECA



CONCURSO DE DEBUXO - "UNHA MASCOTA PARA A NENOTECA"

BASES DO CONCURSO

PARTICIPANTES: 

- Poderá participar todo o alumnado que estea matriculado no colexio coa axuda da súa familia.

- Cada familia poderá presentar un solo debuxo.


NORMATIVA:


- O debuxo realizarase en tamaño DIN A4.

- A mascota debe ser inventada, non copiada nin calcada doutras xa existentes. Terase en conta a orixinalidade do mesma. 

- A mascota debe ter nome propio. 

- Entregaranse dentro dun sobre blanco sen nome. Dentro deste sobre deberá haber outro sobre pequeno cos datos do alumno/a.

- Depositaranse na porta do colexio, nunha caixa habilitada para dito fin. 

- Calquera debuxo que non cumpla as normas anteriormente citadas será descalificado. 


PREMIOS:

A mascota elixida será utilizada en todas as actividades relacionadas coa biblioteca, nos carnés da mesma e será a imaxe do blog. 


PLAZO DE ENTREGA:

- O plazo de entrega comeza no mesmo momento desta publicación e ata o próximo venres 25 de setembro.


XURADO:

- O xurado estará composto polo profesorado que forma parte do equipo da biblioteca. 



ANÍMATE A PARTICIPAR E A FACER DA NOSA BIBLIOTECA UN LUGAR MELLOR!


07 setembro, 2020

BENVID@S AO BLOG DA BIBLIOTECA

Empeza un novo curso cheo de novidades e moitas sorpresas. Entre todas elas estreamos este espazo no que narraremos todas as noticias relacionadas coa biblioteca escolar. 

Cheos de ilusión arrancamos con este novo proxecto que esperamos poder impulsar nos próximos meses, e para o que contamos con todos e todas vós como axuda fundamental. 

Esperamos que vos guste e que entre todos poidamos facer da biblioteca un lugar aínda máis especial. 

Estade atentos xa que proximamente haberá moitas novidades por aquí!