CIENCIA NA BIBLIO 2

Continuamos coas tardes de experimentos e ciencia na biblioteca. Neste caso os alumnos e alumnas de 4º e 5º de Educación Primaria xogaron co ph de diferentes líquidos mesturándoos para conseguir cambiar as súas cores iniciais. 

CIENCIA NA BIBLIO 1

Os peques de 1º e 2º de Educación Primaria xa pasaron pola biblio neste mes da ciencia nas bibliotecas. 

Con eles fixemos un experimento moi divertido que seguro xa están facendo todos nas súas casas!

Deixámosvos algunhas fotos para que vexades o ben que o pasaron!

SEN OUTONO...

A estación do outono en Galicia é moi rica, non só en produtos do campo, senón tamén en refráns e adiviñas, ademais de celebrarse unha das festas máis típicas e tradicionais, o Magosto!

Por iso propúxoselles aos nenos e nenas de primaria que participasen nun xogo moi especial, no que, cada día, aparecía un refrán (incompleto) ou unha adiviña, nun lugar do corredor do colexio e ao longo da xornada escolar tiñan que investigar a parte que faltaba, no caso de ser un refrán, ou acertar coa adiviña.

Cada día, tivemos un representante de cada curso que acertou a adiviña ou o refrán e así de contentos, a pesares das mascarillas, saíron nas fotos desta semana.

NOVEMBRO - MES DA CIENCIA EN GALEGO

Novembro é o mes da Ciencia en Galego nas Bibliotecas.

Por esta razón, ao longo de todo mes realizaremos diferentes actividades en relación coa ciencia nas diferentes clases de Educación Primaria. 

Poderedes ver todo o que fagamos no noso blog así que estade moi atentos!

Deixámosvos tamén algunhas ligazóns de interese en relacións con esta tematica:

https://bibliotecas.xunta.gal/santiago/es/actualidade/avisos/novembro-mes-da-ciencia-en-galego-nas-bibliotecas

https://rbgalicia.xunta.gal/es/actualidade/avisos/mes-de-la-ciencia-en-gallego-en-las-bibliotecas-1

EU RECOMÉNDOCHE

Hoxe queremos compartir con tod@s vós o resultado da actividade que propuxemos con motivo do Día da Biblioteca, o pasado 24 de outubro. 

Estamos moi contentos pola participación de todo o alumnado, desde os máis pequeniños, coa axuda da súa familia, aos maiores do cole, que traballaron de forma autónoma. 

Deixámosvos unha centena de recomendacións lectoras que deixan boa fé do gran gusto pola lectura do noso alumando. 

Esperamos que vos axuden a descubrir novos títulos e a seguir lendo coa mesma ilusión que ata agora!

LETRAS GALEGAS 2020

Este ano, tan diferente, no que as celebracións están limitadas, decidiuse que houbera unha segunda data de celebración do Día das Letras Galegas. Ese día foi o 30 de outubro con motivo do aniversario do nacemento do homenaxeado, Ricardo Carbalho Calero. 

Por iso ese día, na clase de Lingua Galega, traballouse nos diferentes cursos un pouco a este autor e a súa obra a través de actividades variadas que nos levaron a lembrar que todos os días son os día da nosa lingua!

A NOSA MASCOTA

Fai algunhas semanas a Biblioteca propuxo un concurso para conseguir unha mascota que representase a nosa biblioteca. Despois de todo este tempo por fin temos un gañador!!!

Sabemos que estabades ansiosos por coñecer o veredicto do xurado!

A semana pasada fixemos entrega dun diploma a todos os participantes, e por suposto, a Antía, a gañadora deste concurso. O seu debuxo, o Señor Ourizo, será a nosa mascota. 

Algúns dos participantes e a gañadora.

Benvido ao noso cole Señor Ourizo!! Benvido á nosa Nenoteca!

TEMA CENTRAL DA BIBLIOTECA

Esta semana presentamos aos nenos e nenas de Educación Primaria o tema central da biblioteca. 

Trátase dun tema sobre o que xirarán algunhas das actividades programadas dentro do plan anual de lectura do centro. 

Para que descubrisen o tema fixemos un Scape Room no que tiveron que poñer a proba todo o seu enxeño e habilidades para descubrir o enigma final. 

https://view.genial.ly/5f7e00e7334a2e0da75d2b60/game-breakout-scape-room-conecendo-a-biblioteca

Deixámosvos o enlace para ver se sodes quen de descubrir o código final e para que coñezades máis cousas sobre a nosa NENOTECA.

DÍA DA BILIOTECA - 24 DE OUTUBRO

O sábado día 24 de outubro celébrase o Día da Biblioteca. Van xa máis de dúas décadas desde que a Asociación de Amigos do Libro Infantil e Xuvenil propuxeran esta data para facer fincapé nos beneficios destas institucións ao servizo da lectura, da cultura e da cidadanía. 

Con motivo da celebración deste día, desde o equipo de biblioteca propoñemos a toda a comunidade educativa (pais, nais, alumnos de todas as idades, avós, mestres...) a seguinte actividade.

"EU RECOMÉNDOCHE"

- A actividade consiste en pensar nun libro que che gustaría recomendar a outra persoa. 

- Debes debuxar a portada do libro poñendo o título, o autor e a editorial (se é posible). 

- Engade unha frase que resuma por que elixes este libro. 

- Podes descargar a portada en blanco do blog ou pedirlla ao teu titor que che envío o arquivo. 

- Todas as portadas poderanse deixar na entrada do colexio (para Educación Primaria), nunha caixa habilitada para este fin, ou envialas escaneadas a este correo electrónico (para Educación Infantil e os que queiran de primaria): biblioteca@casadoneno.edu.es

- Cada participante pode entregar todas as recomendacións que queira. 

- O día límite de entrega é o 2 de novembro de 2020.

ANÍMATE A PARTICIPAR E RECOMEDAR O TEU LIBRO FAVORITO!

A BIBLIO CHEGA A INFANTIL

A biblioteca do cole tamén pensou nos pequenos de Educación Infantil e repartiu libros entre as clases do primeiro e o segundo ciclo.

Con este préstamo preténdese achegar a lectura a todos eles, e ademais complementar o seu proxecto con libros que lles axuden a descubrir novas cousas sobre os animais. 

Tamén se incluiron libros en inglés para que o teacher poida incluir nas súas sesións contidos relacionados co proxecto e facelo interdisciplinar!

Deixámosvos algunhas fotos para que vexades que caixiñas máis bonitas preparamos para eles!

A BIBLIOTECA E OS PROXECTOS

Dentro do Plan Anual de Lectura o equipo da biblioteca programou numerosas actividades para levar a cabo ao longo deste curso. 

Unha delas é o préstamo de exemplares relacionados coa temática do proxecto a cada aula. 

Por esta razón, esta semana fíxose entrega a cada clase dunha cesta de libros para o recuncho do proxecto dentro de cada aula, que se xestionarán de forma interna sempre que se necesite realizar consultas ou realizar lectura libre. 

Ante a situación actual do Covid, ademais existen unha normas específicas para a súa utilización, que son desinfectar as mans antes de coller os libros, e tras o seu uso deixalos nun espazo de corentena. Transcorridas 24 horas, os mestres volverán a despositalos no recuncho. 

Deste xeito a biblioteca tamén contribúe ao desenvolvemento dos proxectos e anima a todos os peques a seguir aprendendo e investigando a través dos libros. 

OS BOLECHAS VISITAN O NOSO COLE

Hoxe recibimos no edificio de primaria ós Bolechas, os alumnos e alumnas de 1º, 2º e 3º. 

O noso amigo Braulio explicounos que debemos facer ante unha situación de emerxencia: debemos chamar ao 112, manter a calma, intentar explicar o lugar exacto no que nos atopamos...

Pasamos un rato divertido á vez que aprendemos algo moi importante que pode salvar vidas se por desgracia nos toca vivir unha situación extrema. 

Deixámosvos algunhas fotos do momento, algún que outro vídeo e amosámosvos o agasallo que nos fixeron.